Parcu de Monti Claru

Articulu in campidanesu

Su Parcu provintziali de Monti Claru est unu parcu urbanu de Casteddu, de proprietadi de sa Tzittadi metropolitana de Casteddu, in is bixinaus de Is Mirrionis, Is Stelladas, Fonsarda e sa municipalidadi de Pirri. Cun is 25 ètarus suus, est unu de is parcus prus mannus de su cabulogu.

Stòria

Diversus funt is testimòngius de sa passada de is òminis in su montixi de Monti Claru in sa segundu metadi de su millènniu III a.C., e funt staus agataus meda repertis de sa Cultura de Monti Claru itasinada. Funt bisìbilis puru is arruinas de unu putzu sagrau.

Duranti s’etadi giudicali, parit chi su montixi est stau inurbau de una comunidadi de mòngius cistercensis chi ddui ant fraigau unu monastèriu. Est de custu tempus chi su territòriu est stau tzerriau cumenti Villa Sancta Maria de Claro.

In su Setixentu est stada fraigada una domu padronali chi at pigau su nòmini de Villa Clara, chi in su 1896 est stada comparada, paris cun totu is campus acanta, de sa Provìntzia de Casteddu; in su 1900 in custus logus est stadu abertu su Spidali Psichiàtrigu, che est abarrau fintzas a su 1998, serrau po nexi de sa lei Basaglia.

Giai de su 1995 is campus de su malincòmiu funt staus bonificaus e bortaus a essi unu parcu urbanu, pighendi totu sa parti setentrionali de su logu. S’atra metadi est diventada apustis sa Citadella de sa Saludi. In su 1997 su parcu est stau abertu a ufitziali ma non a cumpletu, cosa chi est acuntèssia in su 2001. In su 2005 s’archipìscopu Giuseppe Mani at beneitu sa capella de Santa Maria Crara aintru de su parcu etotu.