Trojan Room Coffee Pot
campidanesa. Abbàida sas àteras bariedades gràficas:
logudoresu · LSC · nugoresu
Trojan Room Coffee Pot fiat su nòmini de unas cantu màchinas de fai cafei chi s'agatànt me in su Computer Laboratory de s'Universidadi de Cambridge, in Inghilterra, chi fiant controlladas po mèdiu de una telecàmera. Sa màgini de sa Trojan Room Coffee Pot fiat trasmìtia in Internet po sa primu borta in su 1991 de Quentin Stafford-Fraser e Paul Jardetzky. Su progetu est migrau apustis in su Web in su 1993, bessendi sa primu webcam de su mundu.[1]
Po evitai chi is traballadoris de s'edifìtziu abarressint delùdius po agatai sa màchina de su cafei buida a pustis de essi arribaus in s'aposentu, ant postu una telecàmera chi fruniat una màgini de sa cafetera a totu is elaboradoris collegaus a s'arretza de s'ufìtziu.[2] Candu sa fotocàmera est stètia acapiada a Internet una pariga de annus apustis, sa cafetera est bessida famada a livellu internatzionale comenti parti de su World Wide Web chi fiat nascendi, finas a candu no dd'ant arretirada in su 2001.[3][4]
Stòria
modìfica
Sa telecàmera, cun risolutzioni 128×128 px, in scala de murru, fiat acapiada a s'arretza locali de su laboratòriu po mèdiu de una scheda de achirimentu vìdeu montada in un'elaboradori Acorn Archimedes. Su circadori Quentin Stafford-Fraser at scritu su programa clienti XCoffee impreendi su protocollu X Window System, mentris su collega suu Paul Jardetzky at scritu su programa serbidori.[5]
In su 1993, is navigadoris web ant tentu sa capatzidadi de amostare is màginis a is impitadoris;[6] sa fotocàmera est istada acapiada a Internet e is scientziaus informàticus Daniel Gordon e Martyn Johnson ant postu a a disponimentu sa màgini in tempus reali cun protocollu HTTP in su mesi de donniasantu de su matessi annu. Est bessida duncas visìbili in totu su mundu e bessida unu puntu de riferimentu populari de su primu Web.
Studamentu e benidoris
modìficaApustis de su trasferimentu de su laboratòriu in sa sei atuali, sa telecàmera est stètia a sa fini studada, a is 09:54 UTC de su 22 austu 2001. Sa noa de su studamentu suu est stètia arremonada in sa primu pàgina de is testadas giornalìsticas The Times e The Washington Post, e artìculus me in The Guardian[7] e Wired.[8][9]
S'ùrtima de is cuàturu o cincu màchinas de fai cafei bidas in lìnia, una Krups, dd'ant bèndia a s'asta in eBay po 3 350 sterlinas a su situ de noas tedescu Spiegel Online. Unus cantu dipendentis Krups dd'ant arrangiada in donu, permitendi de dda torrai a allui in sa redatzioni de sa rivista.[10] De s'istadi de su 2016 est in prèstidu permanenti a s'Heinz Nixdorf MuseumsForum de Paderborn.[11]
Càncua parodia de sa màchina Trojan Room includit s'Hyper Text Coffee Pot Control Protocol, una brulla de abrili de su 1998 chi definit unu protocollu de comunicatzioni, e su video-giogu de su 2002 Hitman 2: Silent Assassin, innui su giogadori podit sciusciai una "màchina fotogràfica de su cafei" in coxina po spàssiu. Sa cafetera est stètia mentovada fintzas in su drama de sa BBC Radio 4 The Archers, su 24 friaxu 2005.[10]
In su primu episòdiu de sa de cuàturu stajonis de sa sèrie TV Halt and Catch Fire de AMC, amostant sa cafetera po arrapresentai sa primu webcam chi aparit in su World Wide Web, chi megàt ne nasci.
Riferimentus
modìfica- ↑ Rebecca Kesby, How the world's first webcam made a coffee pot famous, BBC, 22 novembre 2012. URL consultadu su 5 agosto 2021.
- ↑ Doug Aamoth, You’re Doing It Right: Early Webcam Monitored a Coffee Pot, Time, 8 aprile 2013. URL consultadu su 5 agosto 2021.
- ↑ Quentin Stafford-Fraser, Trojan Room Coffee Pot resources, Università di Cambridge. URL consultadu su 26 ottobre 2006.
- ↑ Daniel Gordon e Martyn Johnson, The Trojan Room Coffee Machine, Università di Cambridge. URL consultadu su 26 ottobre 2006.
- ↑ Quentin Stafford-Fraser, The Trojan Room Coffee Pot, Università di Cambridge. URL consultadu su 3 ottobre 2017.
- ↑ Marc Andreessen, Original proposal of HTMl IMG tag, in 1997.webhistory.org, 25 febbraio 1993. URL consultadu su 5 agosto 2021.
- ↑ Stuart Millar e Ben Summers, Plug pulled on web's historic coffee pot, The Guardian, 7 marzo 2001. URL consultadu su 5 agosto 2021.
- ↑ Quentin Stafford-Fraser, Blog post listing media coverage of the shutdown, in statusq.org. URL consultadu su 26 ottobre 2006.
- ↑ Farewell, Seminal Coffee Cam, Wired. URL consultadu su 5 agosto 2021.
- ↑ 10.0 10.1 The Trojan Room Coffee Pot, BBC World Service. URL consultadu su 22 agosto 2016.
- ↑ The World is at your fingertips - History of the Internet, Heinz Nixdorf MuseumsForum Paderborn
Bibliografia
modìfica- (EN) Quentin Stafford-Fraser, On site: The life and times of the first Web Cam, in Communications of the ACM, vol. 44, nº 7, argiolas 2001, pp. 25-26, DOI:10.1145/379300.379327.