Ìsula de su Prìntzipe Eduardu

Artìculu in LSC

Ìsula de su Prìntzipe Eduardu (in inglesu: Prince Edward Island [PEI] o [P.E.I.]; in frantzesu: Île-du-Prince-Édouard [Î.P.E.]; in Mi'kmaq: Epekwitk; in gaèlicu iscotzesu: Eilean a' Phrionnsa) est una provìntzia canadesa formada de s'ìsula omònima e de 231 àteras ìsulas minores. Su cabulogu est Charlottetown, sa limba uffitziale s'inglesu.

Ìsula de su Prìntzipe Eduardu in su Cànada

Bandera de su P.E.I.

Est una de is tres provìntzias maritimas e sa provìntzia minore in isterrida (5,685.73 km2) e pobulatzione (unos 146,000 bividores). Istoricamente su P.E.I. rapresentat unu de is territòrios cun cussòrgias prus antigas e demograficamente sighit a si caraterizare galu pro sa cumponidura in is grupos immigrados tando: cèlticos, anglu-sàssonus e frantzesos sunt is tres chi binchent in nùmeru subra totu is àteros.

S'economia s'apoderat mescamente subra sa massaria, sa provìntzia produet difatis su 25% de is patatas de su Cànada.

S'ìsula tenet una pariga de nomìngios informales: "Garden of the Gulf" (Giardinu de su Gulfu) in fentomu de is paisàgios de paschimenta e sa massaria, "Birthplace of Confederation" (Logu de Nàschida de sa Cunfederatzione) in fentomu de sa cunferèntzia de Charlottetown de su 1864, mancari su P.E.I. non fiat intradu che provìntzia canadesa de sete in antis de su 1873.