Marco Milanese

Custu artìculu est iscritu cun sa grafia Limba Sarda Comuna. Abbàida sas àteras bariedades gràficas:

campidanesu · logudoresu · nugoresu

Marco Milanese (Gènova, 1958) est un'archeòlogu italianu.

Marco Milanese
Nàschida	1958 Gènova
Natzionalidade	italiana
Alma mater	Universidade de Gènova
Traballu	archeòlogu, professore universitàriu e diretore de museu
Prèmios	Prèmiu Internatzionale de Archeologia “L’Erma di Bretschneider” (1983) Premiu de Produtividade Iscientìfica de s'Universidade de Tàtari (2007)
Positzione de traballu	professore ordinàriu
Interessos printzipales	archeologia urbana, istruturas urbanas e rurales medievales e post-medievales de s'àrea tirrènica, tzirculatzione de sos manufatos de cussos territòrios
Istitutziones de traballu	Universidade de Tàtari
Campu(os)	archeologia medievale e post-medievale

Biografia

Laureadu in Lìteras in s'A.A. 1980-81 in s'Universidade de Gènova, cun una làurea intitulada "Gli scavi dell'oppidum preromano di Genova", s'est a pustis ispetzializadu in s'archeologia medievale e post-medievale, cun unu dotoradu in Archeologia Medievale otènnidu in sas Universidades de Pisa, Siena e Firentze in su 1987 cun sa tesi "Il sito pluristratificato di San Silvestro a Genova".

In su 1983 at bìnchidu sa de III editzione de su Prèmiu Internatzionale de Archeologia "L'Erma di Bretschneider",cun s'òpera Scavi nell'oppidum preromano di Genova.

Intre su 1989 e su 1990 est istadu cunservadore in su Museu Archeològicu de Montelupo Fiorentino, e dae su 1991 a su 1992 est istadu ispetore archeològicu in sa Subrintendèntzia Archeològica de sa Toscana.

Dae su 1992 at incumintzadu a insegnare, comente professore assotziadu, Metodologias de sa Chirca Archeològica e Archeologia Medievale in sas Universidades de Tàtari, Gènova, Arezzo e Pisa, e dae su mese de trìulas de su 2003 est professore ordinàriu de cussas matèrias (chi insegnat in paris cun Topologia Medievale, Istòria de sa Cultura Materiale in s'Edade de Mesu e Archeologia Post-Medievale) in Tàtari. In Pisa at sighidu pro annos a insegnare Archeologia Medievale e Archeologia Tardu-Antiga e Artu-Medievale in s'Iscola de Ispetzializatzione in Archeologia, e como insegnat Archeologia in sas Iscolas de Ispetzializatzione in Archeologia de Aristanis e Casteddu.

Dae su 1973 a su 2015 at dirìgidu prus de 250 campagnas de iscavu e chirca in logos de importu mannu in Ligùria, Sardigna, Toscana, Lombardia, Abrutzu, Tunisia, Frantza e Portogallu.

Dae su mese de abrile de su 2012 est diretore de su Tzentru Interuniversitàriu de Chirca in subra de sas Tecnologias pro sos Benes Culturales de s'Universidade de Tàtari e de sa de Casteddu, e dae su mese de santandria de su 2014 est diretore de su Dipartimentu de Istòria, Iscièntzias de s'Òmine e de sa Formatzione de s'Universidade de Tàtari. In prus, intre su mese de freàrgiu de su 2012 e su de su 2015, est istadu diretore de sos cursos de dotoradu in "Istòria, Literaduras e Culturas de su Mediterràneu" e in "Archeologia, Istòria e Iscièntzias de s'Òmine", semper in Tàtari.

In su 2007 at bìnchidu su Prèmiu de Produtividade Iscientìfica de s'Universidade de Tàtari.

At fundadu e dirigit su Museu Biddas - Museu de sos bidditzolos abbandonados de sa Sardigna, chi tenet sa sede sua in Sossu e chi in su 2013 at bìnchidu sa prima editzione de su Prèmiu "R. Francovich" pro su mègius museu italianu dedicadu a su patrimòniu archeològicu medievale natzionale.

Est membru de s'Editorial Advisory Board de sa rivista Post-Medieval Archaeology, de su Comitadu Iscientìficu de su Butlletì Informatiu de Ceràmica de s'Associació Catalana de Ceràmica de Bartzellona, de sa redatzione de sa rivista Archeologia Medievale e de àteros periòdicos iscientìficos internatzionales.

In su 2021 est divènnidu membru de su comitadu iscientìficu de su Museu Archeològicu Natzionale de Casteddu.

Publicatziones

At iscritu prus de 500 publicatziones, e at fundadu e dirigit sa rivista de istùdios internatzionales Archeologia Postmedievale (dae su 1997) e sa rivista Facta - A Journal of Late Roman, Medieval and Post-Medieval Material Culture Studies (dae su 2012). In prus, at curadu collanas medas de istùdios e chircas, che a "Sardegna Medievale", "Quaderni dei Villaggi Abbandonati della Sardegna", "Documenti di Archeologia Postmedievale" e "Archeologia Urbana ad Alghero".

Ligàmenes esternos

• (IT) Pàgina de Marco Milanese in su situ de s'Universidade de Tàtari, in edissuf.uniss.it. URL consultadu su 17 santandria 2020 (archiviadu dae s'url originale su 23 santandria 2020).
• Marco Milanese, in uniss.academia.edu. URL consultadu su 17 santandria 2020.
• Marco Milanese, in researchgate.net. URL consultadu su 17 santandria 2020.