Blockbuster (azienda)

Custu artìculu est iscritu cun sa grafia Limba Sarda Comuna. Abbàida sas àteras bariedades gràficas:

campidanesu · logudoresu · nugoresu

Blockbuster, Inc. est istada una sotziedade de ispainadura istadunidensa, fundada in su 1985 in Dallas (Texas) e fallida in su 2013. Sa faina printzipale sua fiat su nòlitu de produtos home video e videogiogos e, a pustis, in s'ispainadura digitale de càbidos.

Blockbuster
Logo de Blockbuster in antis a una butega de Rockhampton
Logu de fundatzione	Dallas
Data de fundatzione	1985
Serradura	12 ghennàrgiu 2014
Grupu	Dish

A pustis de su fallimentu, subravivet una butega Blockbuster in Bend (Oregon).

Istòria

Una butega Blockbuster in Moncton, Canadà (2008)

Sa prima butega Blockbuster est istada aberta in Dallas, Texas, in su 1985. In is deghe annos imbenientes su nùmeru de butegas in is Istados Unidos est arribadu a 4800. In s'ìnteri, in su 1989, s'azienda at comporadu una cadena inglesa chi esistiat giai e at abertu sa prima butega in Europa. In is annos 1990 Blockbuster at abertu butegas in 25 paisos, comente Canadà, Austràlia, Zelanda Noa, Giapone, Isvìtzera, Britànnia Manna, Portugallu, Danimarca, Israele, Mèssicu, Argentina e Itàlia, in ue est arribada in su 1994 pro mèdiu de una joint venture cun Standa-Fininvest. In su 1994 Blockbuster est comporada dae sa Viacom, una sotziedade de intratenidura e comunicatzione istadunidensa.

Fache a sa fine de is annos 2000 est incumentzadu unu perìodu de crisi manna pro s'azienda. Is dificultades in unas cantas natziones, comente a is Istados Unidos, sunt ligadas a sa resèssida de servìtzios simigiantes comente cuddu ofertu dae sa cuncurrente Netflix. In custu perìodu s'azienda abbandonat luego su mercadu i unos cantos paisos comente Ispànnia e Portugallu; in àteros, comente s'Itàlia, Blockbuster intentat de s'adderetzare sena nche resèssere.

Sa dificultade econòmica de Blockbuster sighit fintzas in su 2010, annu in ue arribat sa detzisione de aviare su protzedimentu fallimentare. Su matessi annu s'azienda decrarat bancarota apellende·si a su Capìtulu 11 de sa lege fallimentare istadunidensa, intentende un'assètiu aziendale nou atzentradu prus che totu in sa ispainadura digitale, chi insandus fiat ancora una novidade.

Messàgios de chèscia in antis a unu Blockbuster de Lanús, Argentina (2010)

In su 2011 Blockbuster intentat un'aviu nou, cun sa bèndida a Dish Network. In s'ìnteri però annùntziat s'abbandonu de su mercadu canadesu, sighidu in su 2012 fintzas de s'italianu. S'annu a pustis Dish Network annùntziat sa serrada de àteras 300 butegas in is Istados Unidos: sa noa ponet fine a un'època, sa de su nòlitu «fìsicu» de produtos audiovisivos.

Dae su 2019 subravivet un'ùnica butega Blockbuster in su mundu, in sa tzitadina de Bend, in Oregon, chi pro is piessìnnios de su logu (pagu pobuladu e duncas pagu connètidu a Internet) sighit in manera positiva s'atividade, agiudada fintzas dae is nostàlgicos chi lompent de foras; mancari impreet su logo e su nùmene de sa cadena, sa butega est autònoma e de propiedade de is gestores suos.