Yūrei

Articulu in nugoresu

Yūrei est sa paragula chi, in sa curtura giapponesa, istat pro pantasima. Comente a sos fradiles otzidentales suos, fintzas su pantasima giapponesu tenet medas variedades, e.g. Ubume, mortu a puntu de dare bida a una criadura, o Zashiki-warashi, su poltergeist giapponesu.

Caratteres tipicos

Su pantasima giapponesu est fentomadu pro custas caratteristicas (unu pacu a cumone chin sas categorias otzidentales):

• Bestimenta bianca: comente in sa curtura sarda a sos mortos si ponìat una caretta, a sos mortos giapponesos si ponìat una bestimenta de colore arbu: a su solitu, tradissione bolet chi siat unu Kimono, ma como podet esser puru una bestimenta simpre simpre.
• Pilos nigheddos: a s'ispissu longos e tottu male accontzaos. Si pessat chi custa bidea benzat dae su teatru Kabuki, ma est nòdiu chi sos giapponesos, supratottu sas feminas, si lassaban crescher sos pilos in conca longos longos, pro los cumpònner chind unu firmàlliu. In sa morte, sa conca si lassabat libera dae custas cosas.
• Farta de pedes: dae su periodu Edo in susu, si credet chi a sos pantasimas manchen ancas e pedes.
• Hitodama: unu focu de colore turchinu a curtzu de su mortu. Si podet acattare un'assimizu cun sos focos de campusantu.

Pantasimas particulares

• Onryō: ispiritos malintragnaos de zente chi torrat a su mundu de sos vivos pro su chi de malu lis est capitàu in bida.
• Ubume: ispiritu de femina chi sìnche morit a puntu de dare luche a unu fizu: torrat a su mundu de sos vivos petzi pro attender a sa criadura.
• Funayūrei: pantasima malu de zente morta in mare, chi bolet chi peri sos atteros facan sa matessi fine.
• Zashiki-warashi: su matessi giapponesu de su Poltergeist, francu su fattu chi sìan petzi pitzinnos.
• Ikiryō: manifestada de un'anima (Reikon) de una pessone galu in bida chi trummentat a un'inimicu suo; si podet assimizare a su tedescu doppelgänger.
• Goryō: pantasima de zente, mescamente aristocratica, chi sìnche est mortu de martire.