Wikipedia

EjaTV

canale televisivu sardu
Custu artìculu est iscritu cun sa grafia Limba Sarda Comuna. Abbàida sas àteras bariedades gràficas:

campidanesu · logudoresu · nugoresu


EjaTV est unu canale televisivu sardu.

Istòria

modìfica

Fundadu in su 2014, est nàschidu dae un'idea de su giornalista, iscritore, iscienegiadore e produtore tzinematogràficu Tore Cubeddu, e pro mèdiu de sa collaboratzione intre sa domo de produtzione fundada dae issu duos annos in antis, Terra de Punt, e su tzircùitu Sardex.[1][2][3][4] Sa punna sua est sa de fàghere trasmissiones in limba sarda e in sas àteras limbas de Sardigna (tataresu, gadduresu, catalanu saligheresu e tabarchinu).[1][5] Pro custa resone, sos fundadores ant isseberadu de lu presentare a su pùblicu cun sa fràsia "sa Tv de sas limbas de Sardigna, sa Tv de sos sardos".[3]

Pro sos primos 5 annos est istada una webtv, trasmitende sos programmas suos in su situ web suo, in unos cantos suta-canales,[4] ma dae su 2020, pro mèdiu de su sinnale multiplicadu de Sardegna Uno,[3] at incumintzadu a trasmìtere in su canale 172 de su digitale terrestre. Sas trasmissiones suas s'òcupant de argumentos medas: sas atividades ligadas a sa terra sarda, s'istòria antiga, s'iscièntzia, sa literadura, sa mùsica, s'economia, sa polìtica e àteru.[1][6][2][7]

At collaboradu cun Areavisuale Film de Paolo Carboni, cun s'Assòtziu culturale Babel, fintzas pro sa trasmissione de su Babel Film Festival[8] e pro su Prèmiu Kentzeboghes[9][10], cun Sardegna Produzioni, cun Arionline (Youtg), cun s'iscuàdra de fùbalu de su Casteddu, cun Sardegna Teatro, cun s'istùdiu Inoke de Nùgoro e cun àteros entes e aziendas de sa Sardigna.[5]

In su 2016 at collaboradu cun sa Fundatzione Sartìglia pro s'editzione de sa Sartìglia de cuss'annu, trasmitende in direta su vìdeu de s'eventu cun cummentos in tres limbas: sardu, italianu e inglesu. Cussas diretas las ant pompiadas prus de 35000 persones.[2][11]

In su 2019 at trasmìtidu sa direta de s'òpera teatrale "Processo alla statua di Carlo Felice" de s'atore e regista Gianluca Medas, nàschida dae s'ispiratzione de su sàgiu Carlo Felice e i tiranni sabaudi, de Frantziscu Casula, chi at tentu unu sutzessu mannu de pùblicu.[12][13][14]

Semper in su 2019[15], in paris cun Terra de Punt,[16] at produidu una sèrie televisiva in ses puntadas, "Adrià- Beni cun me!", in ue Adrià Martín-Mor, un'istudiosu e professore catalanu espertu de tradutzione automàtica e ativista pro sa limba sarda, biàgiat cun unu furgone in totu sa Sardigna chistionende in sardu e in sas àteras limbas sardas siat cun chie s'òcupat de valorizatzione de cussas limbas siat cun persones agatadas in sa carrera, pro cumprèndere ite raportu tenent sos abitantes de s'ìsula cun su sardu e sas àteras limbas locales issoro. Sa sèrie l'at comporada e trasmìtida sa RAI, in su canale suo RAI3, in su ghennàrgiu e in su freàrgiu de su 2021, e at retzidu interessu mannu dae parte de su pùblicu, e fintzas a livellu giornalìsticu internatzionale.[17][18][19][20]Semper Adrià Martín-Mor at iscritu e cantadu sa colonna sonora e sa sigla de sa sèrie, chi a pustis at publicadu in lìnia in unu discu a litzèntzia aberta.[21]

Semper in su 2021, pro neghe de sa pandèmia de COVID-19, s'editzione annuale de sa Sartìglia est istada annullada, e remplasada cun una sèrie de eventos belle totus in digitale. EjaTV s'est ocupada de trasmìtere in sos canales suos sas tzelebratziones de sa Candelera, films curtzos, filmados, programmas de aprofundimentu e de dibata e intervistas.[22][23][24][25]

A sa fine de su 2021, a pustis de sa modìfica de sas frecuèntzias de su digitale terrestre in Sardigna[26], EjaTV at incumintzadu a trasmìtere sas produtziones suas in un'emitente televisiva noa, Radio Televisione Sarda, in su canale 79 e in su situ e su canale ufitziales suos[27], in collaboratzione cun s'Assòtziu Culturale Torretonda de Tàtari, Terra de Punt, SardegnaEventi24, Produzioni Sardegna e s'Assòtziu Babel.[28]

Riferimentos

modìfica
  1. ↑ 1.0 1.1 1.2 Gabriele Tanda, EjaTV: su sardu in sa modernidade, in Limba Sarda 2.0, 28 freàrgiu 2020. URL consultadu su 15 freàrgiu 2021.
  2. ↑ 2.0 2.1 2.2 (IT) EjaTV: nuovi format e partnership importanti per la web tv dei sardi, in Il Magazine di Sardex.net, 15 abrile 2016. URL consultadu su 15 freàrgiu 2021.[ligàmene interrùmpidu]
  3. ↑ 3.0 3.1 3.2 (IT) Tv locali, Sardegna. Sul mux di Sardegna 1 parte Eja Tv, una vera novità per la regione. Un’emittente che vuol essere la voce di tutti i sardi e delle aziende dell’isola, in Newslinet, 2 ghennàrgiu 2019. URL consultadu su 15 freàrgiu 2021.
  4. ↑ 4.0 4.1 (IT) Marco Scaramella, EJATV: LA TV DEI SARDI!, in S&H Magazine, 4 trìulas 2016. URL consultadu su 15 freàrgiu 2021.
  5. ↑ 5.0 5.1 (IT) Ignazio Sanna, Sardegna: Eja Tv fra radici e ali, in Agoravox, 29 santugaine 2019. URL consultadu su 15 freàrgiu 2021.
  6. ↑ Gabriele Tanda, Nicola Dessì: aici conto sa Sardigna antiga, in Limba Sarda 2.0, 3 trìulas 2020. URL consultadu su 15 freàrgiu 2021.
  7. ↑ EJATV - Canale 172 de su Digitale Terrestre, in ejatv.com. URL consultadu su 15 freàrgiu 2021.
  8. ↑ (IT) Torna il Babel festival, voce alle minoranze linguistiche, in ANSA, 1º freàrgiu 2021. URL consultadu su 15 freàrgiu 2021.
  9. ↑ Babel Film Festival 2021, in Limba Sarda 2.0, 3 freàrgiu 2021. URL consultadu su 18 nadale 2021.
  10. ↑ (IT) Kentzeboghes Editzione 2021/2022, in Babel TV. URL consultadu su 18 nadale 2021 (archiviadu dae s'url originale su 30 trìulas 2021).
  11. ↑ (IT) Sartiglia, diretta streaming e seguito record sui social per l'edizione 2016, in Il Magazine di Sardex.net, 12 freàrgiu 2016. URL consultadu su 15 freàrgiu 2021 (archiviadu dae s'url originale s'11 austu 2020).
  12. ↑ (IT) “Processo alla statua di Carlo Felice” replica, la discussione appassiona i cagliaritani, in Vistanet, 28 austu 2020. URL consultadu su 14 freàrgiu 2021.
  13. ↑ (IT) A Cagliari “Processo alla statua di Carlo Felice”, in Sardegna Reporter, 28 austu 2020. URL consultadu su 14 freàrgiu 2021.
  14. ↑ (IT) Processo alla statua di Carlo Felice - rappresentazione teatrale c/o palazzo regio in Cagliari, in Sardegnaeventi24. URL consultadu su 14 freàrgiu 2021 (archiviadu dae s'url originale su 16 maju 2021).
  15. ↑ (IT) Sardegna in tv, domani la prima puntata di un programma sulle lingue dell’Isola, in Vistanet, 2 ghennàrgiu 2021. URL consultadu su 15 freàrgiu 2021.
  16. ↑ Cumintzat dae Casteddu sa sèrie in ses puntadas “Adrià – Beni cun me!”, in SardegnaEventi24. URL consultadu su 15 freàrgiu 2021 (archiviadu dae s'url originale su 30 trìulas 2021).
  17. ↑ (CA) David Paloma, El foraster sard, in El Punt Avui, 12 ghennàrgiu 2021. URL consultadu su 15 freàrgiu 2021.
  18. ↑ (CA) El ‘foraster’ de la televisió pública italiana, in RAC1, 17 ghennàrgiu 2021. URL consultadu su 15 freàrgiu 2021.
  19. ↑   (CA) TV3, Planta baixa - Les claus del vot per correu, a 45 min 52 s.
  20. ↑ (CA) Alicia Salvatella, "Estem en un procés global de desertificació lingüística", in Diari de Barcelona, 4 freàrgiu 2021. URL consultadu su 15 freàrgiu 2021.
  21. ↑ Adrià Martín-Mor, Lo somrís de la magrana, in Adrià Mor – Música catalanosarda | mùsica sarducatalana. URL consultadu s'8 maju 2021 (archiviadu dae s'url originale s'8 maju 2021).
  22. ↑ (IT) Covid, Sartiglia annullata: celebrazioni sul web, in La Nuova Sardegna, 30 ghennàrgiu 2021. URL consultadu su 15 freàrgiu 2021.
  23. ↑ (IT) Al via gli Eventi di Sartiglia: mostre, maratone tv e concorsi per il carnevale, in LinkOristano.it, 5 freàrgiu 2021.
  24. ↑ (IT) Eventi di Sartiglia 2021, ecco il programma dal 4 al 16 febbraio, con mostre, speciali TV e WEB!, in Sardegna in Blog, 6 freàrgiu 2021. URL consultadu su 15 freàrgiu 2021.
  25. ↑ (IT) Al via gli Eventi di Sartiglia 2021: mostre, maratone tv e concorsi per il carnevale | Oristano Noi, in oristanonoi.it. URL consultadu su 15 freàrgiu 2021.
  26. ↑ (IT) Sardegna e Tv digitale: una situazione in costante evoluzione, in FM-World, 2 nadale 2021. URL consultadu su 25 ghennàrgiu 2022.
  27. ↑ Como podides sighire totu is produtziones de Ejatv in sa Radio Televisione Sarda fintzas in streaming in su situ, in Facebook. URL consultadu su 25 ghennàrgiu 2022.
  28. ↑ (SC, IT) Sardegnaeventi24.it - Est nàschia sa Radio Televisione Sarda, in www.facebook.com. URL consultadu su 25 ghennàrgiu 2022.

Ligàmenes esternos

modìfica
Bogadu dae "https://sc.wikipedia.org/w/index.php?title=EjaTV&oldid=181938"