Wikipedia

Unione Europea

entidade polìtica subra-istatale de unione polìtica e econòmica de istados europeos


Articulu in campidanesu

S'Unioni europea (in curtzu UE o Ue) est una entitadi politica subranatzionali e intergovernativa ca incluit 28 paisus membrus indipendentis e democraticus. Sa sua istitutzioni cun su nomini de immoa benit de su trattau de Maastricht de su 7 de freargiu de su 1992 (e at pigau su balori su 1u de ognassantu de su 1993), a custu is stadus ca ddis pigant parti, ddis funt lompius a pustis de su tretu mannu de is Comunidadis europeas ca esistiant primu. De su 1u de argiolas de su 2013 est imbuccada in s'Unioni peri sa Croatzia.

Bandera de s'Unioni europea
Is treminis de foras de s'Unioni europea.
Commissioni europea

S'Unioni consistit immoa in ddunu logu de liberu mercau, ca nant mercau comunu, e ca tenit, tra is atras cosas, de una moneda unica, s'euro, regulada de sa Banca centrale europea e immoa adottada de 17 de is 27 staus membrus; issa in prus tenit una unioni doganali nascia giai cun su trattau de Roma de su 1957 ma cumpletada intr'e is paisus ca pigant parti a is accordius de Schengen, ca faint fianza a is cittadinus insoru de sa libertadi de si movviri, traballu e investimentu a intru de is staus membrus. S'Unioni presentat, in prus, una politica agricola comuna, una politica commerciali comuna e una politica comuna de sa pisca.

S'Unioni europea no est una semplici organizatzioni intergovernativa (comenti s'ONU) né una federatzioni de Staus (comenti is Staus Unius), ma unu organismu sui generis, a is suas istitutzionis is staus membrus donant parti de sa propria soberanidadi natzionali. Is suas competenzias andant de is affaris esterus a sa defensa, a is politicas economicas, a s'agricultura, a su commerciu e a sa protetzioni de s'ambienti. In calincunu de custus campus is funtzionis de s'Unioni europea dda faint simili a una federatzioni de staus (pon'esempiu, po is affaris monetarius o is politicas po s'ambienti); in atrus settoris, invecis, s'Unioni est accanta a essiri una confederatzioni (pon'esempiu, po is affaris de intru) o a una organizatzioni internatzionali (comenti po sa politica de foras).

Is organus prus importantis de s'Unioni ponint paris su Consixu (nomini ca at remplasau Consixu de is Ministrus de su Trattau de Maastricht), sa Commissioni, sa Corti de Giustissia, su Parlamentu, su Consixu europeu e sa Banca centrale europea. S'istitutzioni de s'Europarlamentu benit de su 1950 e de su 1979 is eurodeputaus (is parlamentaris europeus) funt elixus in manera democratica, in totus is territorius de s'Unioni, a suffragiu universali, po unu tempus in carriga de cincu annus. Oi s'UE est cunsiderada una potentzia leader ind unu mundu multipolari.

Status po sa lei

modìfica

Candu s'est incumenciada s'Unioni fut una organizatzioni internatzionali, ma cun is annus, at a pagu a pagu pigau medas prerogativas ca funt tipicas de una federatzioni, candu is staus membrus ant cumenciu a trasfèrriri poderis e soberanidadi a is organismus comunitarius. Issa est fundada a immoa e totu in trattaus internatzionalis recepius de totus is Staus membrus ma at assumiu personalidadi giuridica propria.

A immoa si basat in duus trattaus fundantis: su Trattau a pitzu de s'Unioni europea (TUE; ddi nant peri "Trattau de Maastricht") e su Trattau a pitzu de su funtzionamentu de s'Unioni europea (TFUE; ddi nant peri "Trattau de Roma"), mudaus pagu tempus fait de su Trattau de Lisbona. A i custus s'acciungint su Trattau Euratom e sa Carta de is derettus fondamentalis de s'Unioni europea e su matessi Trattau de Lisbona donat a i cuctus balori vinculanti.

Su problema de sa definitzioni de su status giuridicu e immoa de s'Unioni est sbuccau, su 29 de ladamini de su 2004, cun sa firma, in Roma, de su Trattau ca adottat una Costitutzioni po s'Europa, connottu comenti Costitutzioni europea. Custu testu arremacciat sa possibilidadi de una cooperatzioni prus forti po sa promotzioni de initziativas po s'integratzioni a intr'e grupus de paisus, giai previdia in su trattau de Amsterdam e in su de Nizza.

Unu trattau nou fut stetiu rechediu de su Consixu europeu cun sa Declaratzioni de Laeken poitta su funtzionamentu de is istitutzionis comunas, si pensat pagu adatta a sa mannaria de 27 staus membrus, d'ognunu de custus cun derettu de vetu in areas fondamentalis de sa politica comuna.

Sa ratifica de sa Costitutzioni, perou, est stetia interrumpia su 29 de mau de su 2005 cun unu referendum popolari a uba su 54,7% de is elettoris francesus at sceberau de no sutascriiri su Trattau; pagu diis in fattu, su 1u de lampadas, peri sa popolatzioni de is Paisus Bascius s'est dichiarada contra a su Trattau (cun su 61,6% de is votus). Peri chi 18 staus membrus iant recepiu su documentu, prus che atru po bia parlamentari, sa c.d. Costitutzioni europea no est imbuccada in vigori.

A pustis de unu "tempus de reflèscia" de duus annus, su cancellieri tedescu Angela Merkel at decidiu de torrai a fai su processu de riforma cun sa Declaratzioni de Berlino de su 25 de martzu de su 2007, in s'occasioni de is 50 annus de s'Europa unia, bolendu fai is traballus a lestru po podiri fai imbuccai su trattau in tempus po is eletzionis europeas de su 2009.

S'est tenta, degaici, a suta de sa presidentzia tedesca de s'Unioni su vertici de Bruxelles intr'e su 21 e su 23 de lampadas de su 2007 auba funt lompius a unu accordiu po su nou trattau de riforma. S'accordiu pigat una parti manna de is novidadis contennias in sa chi nant Costitutzioni, peri chi cun caliguna mudada po cuai unu pagu su caratteri naraus "costitutzionali" de su testu becciu, peri chi funt stetius torraus a ponniri tottus is meccanismus introdusius cun sa Costitutzioni, e in prus acciungendu sa facultadi po calincunu paisu de "bessiri a foras" de certas politicas comunas.

Una borta concludia sa conferenza intergovernativa ca iat finalizzau testu nou, su trattau de Lisbona est stetiu approvau in su Consixu europeu de su 18 e 19 de ladamini de su 2007 in custa cittadi e totu e firmau su 13 de idas de is capus de Stau e de governu. Su trattau est stetiu ratificau de casi tottus is Staus ca iant firmau, po parti manna po bia parlamentari, in su 2008. Sa mancada ratifica de s'Repùbrica de s'Irlanda po curpa de unu referendum confermativu, comenti rechediu de sa Costitutzioni irlandesa, no at permittiu de ddu fai imbuccai in vigori po is eletzionis europeas de su 2009. Est stetiu, po cussu, convocau un'atru referendum in Irlanda su 2 de ladamini de su 2009, a uba su trattau est stetiu approvau cun prus de su 67% de is votus[1]. De su 3 de ognassantu de su 2009, data de s'eja definitivu de sa Repubblica Ceca, tottus is staus membrus ant ratificau su trattau,[2][3] imbuccau in vigori su 1u de idas de su 2009.[4]

Competenzias de s'Unioni europea

modìfica

Su trattau de Lisbona definidit in manera precisa is competenzias de s'Unioni distinghendu intr'e:

  • competenzias esclusivas (art. 3 TFUE);
  • competenzias concurrentis (art. 4 TFUE);
  • competenzias de coordinamentu (art. 5 TFUE);
  • competenzias de accossa (art. 6 TFUE).

Competenzias esclusivas

modìfica
« 1. S'Unioni tenit competenzia esclusiva in is settoris chi sighint:

a) unioni doganali;
b) definitzioni de is regolas de concurrentzia;
c) politica monetaria po is Staus membrus ca tenint s'euro comenti moneta;
d) allogadura de is risorsas biologicas de su mari in sa politica comuna de sa pisca;
e) politica commerciali comuna.

2. S'Unione tenit in prus competenzia esclusiva po concluiri accordius internatzionalis chi custa conclusioni est previdia in unu attu de lei de s'Unioni o serbit po ddi cunsentiri d esercitai is competentzias suas a livellu de intru o cantu podit incidiri in normas comunas o ddi mudai s'importantzia. »

(TFUE, art. 3)


In custus campus, s'Unioni e bia tenit giurisditzioni, is Staus tenint petti s'obbligu de recepiri is direttivas applicai is regolamentus. [5]

Competenzias concurrentis

modìfica
« 1. S'Unioni tenit competenzia concurrenti cun sa de is Staus membrus candu is trattaus ddi donant una competenzia ca no est in is settoris in is articulus 3 e 6.

2. Ss'Unioni tenit una competenzia concurrenti cun sa de is Staus membrus in is principalis settoris chi sighint:

a) mercau de intru;
b) politica sociali, po su chi concernit is aspettus definius in su trattau;
c) coesioni economica, sociali e territoriali;
d) agricultura e pisca, a parti s'allogadura de is risorsas biologicas de su mari;
e) ambienti;
f) tutela de is consumadoris;
g) trasportus;
h) retis transeuropeas;
i) energia;
j) spaziu de libertadi, seguresa e giustissia;
k) problemas comunus de seguresa in materia de sanidadi publica, po is aspettus definius in su trattau.

3. In is settoris de sa ricerca, de su svilupu tecnologicu e de su spaziu, s'Unioni tenit competenzia po fai azionis, in particulari sa definitzioni e s'attuatzioni de programmas, senz'e che fai custa competenzia possat tenni comenti effettusu de impediri a is Staus membrus de fai sa insoru.

4. In is settoris de sa cooperatzioni a su svilupu e de s'axudu umanitariu, s'Unioni tenit competenzia po portai a innati azionis e una politica comuna, senza ca fai custa competenzia podat tenniri comenti effettu de impediri a is Staus membrus de fai sa insoru. »

(TFUE, art. 4)


In is settoris elencaus a su comma 2 sa competenzia primaria est de s'Unioni e su rolu de is Staus est pagu cosa; custus podint fai leis in custus campus in conformidadi a cantu est decidiu de s'Unioni e bia o o chi custa appat decidiu de no esercitai sa sua giurisditzioni. Invecis in is settoris de sa ricerca, de su svilupu tecnologicu e aerospaziali, de sa cooperatzioni a su svilupu e de is axudus umanitarius s'Unioni e is Staus faint totu as duus cun is strumentus specificus insoru. S'Unione tot'a su prus adottat politicas de coordinamentu, senza perou limitai in nisciuna manera s'azioni statali.[5]

Competenzias de coordinamentu

modìfica
« 1. Is Staus membrus coordinant is politicas economicas insoru a intru de s'Unioni. Po custu Consixu adottat mesuras, in particulari is indiritzus generalis po custas politicas.

A is Staus membrus ca tenint comenti moneda s'euro si applicant dispositzionis specificas.

2. S'Unioni pigat mesuras po assegurai su coordinamentu de is politicas de s'occupatzioni de is Staus membrus, in particulari in sa definitzioni de is orientamentus po custas politicas.

3. S'Unioni podit pigai initziativas po assegurai su coordinamentu de is politicas socialis de is Staus membrus »

(TFUE, art. 5)


Po is politicas economicas, de s'occupatzioni e socialis s'Unioni tenit su rolu de coordinadori e donat is linias de ghia (po mediu de su Consixu e bia) e in custas ogna Stau est liberu de determinai is suas politicas particularis.[5]

Competenzias de accossa

modìfica
« S'Unioni tenit competenzia po fai azionis po sustenniri, coordinai o completai s'azioni de is Staus membrus. Is settoris de custas azionis, po su chi serbit a s'Unioni, funt is chi sighinti:

a) tutela e mellioramentu de sa saludi umana;
b) industria;
c) cultura;
d) turismu;
e) istrutzioni, formatzioni professionale, gioventudi e sport;
f) protetzioni civili;
g) cooperatzioni amministrativa. »

(TFUE, art. 6)


In is settoris in pitzu s'Unioni no tenit nisciunu poderi legislativu, ne podit vinculai is Staus, deppit perou mediai politicamenti po podiri permittiri ca custas politicas possant essiri coordinadas.[5]

Opt-out

modìfica

Peri chi requisitu fundamentali po imbuccai in s'Unioni europea est agualai su derettu e is politicas de intru a s'acquis communautaire, po si podiri benniri a una integratzioni europea balida , cun is annus is trattaus e su ettu de fai anti concediu a calincunu Stau sa possibilidadi di no pigai parti a calincuna politica comuna o a particularis strutturas comunitarias. Ai custas eccetzionis ddi nant "opt-out".

Is Staus ca godint de s'opt-out funti:

Su Regnu Uniu est stètiu in passau su stadu cun prus dèrogas (cuatru). Su status ispeciali britànnicu in custus cuatru acòrdius s'est risoltu cun sa Brexit, candu su paisu, abbandonendi s'Unioni, at negotziau un'acòrdiu nou cun Bruxelles. Fintzas a sa dìi efetiva candu su Regnu Uniu at lassau s'Unioni Europea, is cuatru dèrogas sunt abarradas comenti si siat in vigore.

Declaratzionis, conventzionis, attus, trattaus e accordius

modìfica
 
Il Quai d'Orsay a Parigi, auba Schuman at tentu sa sua declaratzioni.

Is annus scrittus in segus funt is de is data de firma de is attus: calincuna borta custas podint essiri diversas, meda puru, de is datas de candu cussus e totu ant pigau balori.

1950 Declaratzioni Schuman
1951 Trattau de Parigi
1954 Trattau de Bruxelles mudau a pitzu de s'UEO
1955 Risolutzioni de Messina
1957 Trattaus de Roma
1965 Trattau de scallamentu
1970 Trattau de Lussemburgo
1983 Declaratzioni solenni a pitzu de s'Unioni europea
1985 Accordius de Schengen
1986 Attu Unicu Europeu

1992 Trattau de Maastricht
1994 Accomodamentu de Ioannina
1997 Declaratzioni a pitzu de s'UEO
1997 Trattau de Amsterdam
2001 Trattau de Nizza
2001 Declaratzioni de Laeken
2004 Costitutzioni europea
2007 Declaratzioni de Berlino
2009 Trattau de Lisbona

Cronologia de s'integratzioni europea

modìfica

09/05/1950 Sa Declaratzioni Schuman ponit sa voluntadi de una Europa Unia ca at a portai a s'istitutzioni de sa Comunitadi europea de su craboni e de s'acciaiu.

18/04/1951 Is ses staus fundadoris in su 1951 (Germania Ovest, Francia, Italia, Belgiu, Paisus Bascius, Lussemburgu) firmant su trattau de Parigi, ca fait nasciri ofissialmenti sa CECA.

23/05/1952 Is ses staus firmant su trattau istitutivu de sa Comunitadi europea de difesa.

30/08/1954 S'Assemblea Natzionali Francesa nci torrat sa CED, ca no at a imbuccai mai in balori.

01/06/1955 De su 1º a su 3 de lampadas nc'est sa importanti Cunferenzia de Messina.

25/03/1957 Is Trattaus de Roma istituint aa Comunitadi economica europea.

01/07/1968 Imbuccat a balori s'unioni de is duanas.

01/01/1973 Danimarca, Repùbrica de s'Irlanda e Regnu Uniu aderint a sa CEE.

10/06/1979 Primus eletzionis a suffragiu universali derettu de su Parlamentu europeu.

01/01/1981 Sa Grecia aderit a sa CEE.

19/06/1983 Is dexi paisus ca aderint a is Comunidadis europeas adottant sa Declaratzioni nodia a pitzu de s'Unioni europea.

01/01/1986 Portugallu e Spagna aderint a sa CEE.

03/10/1990 S'unidadi de sa Germània fait aderiri in automaticu peri sa ex Repubblica Democratica Tedesca a sa CEE.

07/02/1992 Is doxi staus CEE firmant su Trattau de Maastricht, ca istituit s'Unioni europea.

01/11/1993 Pigat balori su Trattau de Maastricht, ca istituit s'Unioni europea.

01/01/1995 Austria, Finlandia e Svetzia aderint a s'Unioni europea.

26/03/1995 In Francia, Benelux, Germània, Spagna e Portugallu pigant balori is acordius de Schengen.

22/07/1997 Sa Declaratzioni a pitzu de s'UEO istituit una cooperatzioni prus forti intr'e UE e UEO.

02/10/1997 Is cuindixi staus membrus de s'Unioni firmant su Trattau de Amsterdam.

26/10/1997 Is acordius de Schengen pigant balori peri po s'Italia.

01/11/1997 Is acordius de Schengen pigant balori peri po s'Austria.

01/01/1999 Imbuccat s'euro.

01/05/1999 Pigat balori su Trattau de Amsterdam.

01/01/2000 Is acordius de Schengen pigant balori peri po sa Grecia.

25/03/2000 Is acordius de Schengen pigant balori peri po Danimarca, Finlandia, Islanda, Norvegia e Svetzia.

19/04/2000 Regnu Uniu e Spagna firmant unu acordiu ca ammanniat sa cittadinanza de s'Unioni a Gibilterra, ca diventat su primu territoriu de foras de su Regnu Uniu a imbuccai in is treminis de s'UE.

11/12/2000 Is cuindixi staus membrus firmant su Trattau de Nizza.

15/12/2001 Is cuindixi paisus de s'UE adottant sa Declaratzioni de Laeken ca previdit sa criatzioni de sa Conventzioni europea.

01/01/2002 S'euro est sa valuta legali de doxi paisus de s'Unioni e peri de San Marino, Vaticanu e Monaco, in prus in de facto is territorus de su Montenegru e de su Kòssovu (in cussu tempus tottu a is duus partis de sa confederatzioni de Serbia e Montenegru) e in Andorra.

01/01/2003 S'Unioni sighit a s'ONU, in Bòsnia Erzegovina, po ghiai su contingenti ca deppit ponni paxi in sa regioni.

01/02/2003 Pigat balori su Trattau de Nizza.

01/05/2004 Cipru, Estonia, Lettonia, Lituania, Malta, Polonia, Republica Ceca, Slovacchia, Slovenia e Ungheria aderint a s'UE.

29/10/2004 Benit firmau in Roma su trattau ca adottat una costitutzioni po s'Europa.

01/01/2007 Bulgaria e Romania aderint a s'UE. Sa Slovenia adottat s'euro.

25/03/2007 S'UE fait 50 annus: in ddunu vertici informali benit adottada sa Declaratzioni de Berlino po ciccai de sbloccai s'impasse costitutzionali.

23/06/2007 Su Consixu europeu agatat s'acordiu a pitzu de su Trattau de riforma ca at a pigai su postu de sa Costitutzioni europea.

13/12/2007 Is capus de stau e de guvernu firmant su trattau de Lisbona.

21/12/2007 Is acordus dei Schengen pigant balori peri po s'Estonia, sa Lettonia, sa Lituania, Malta, sa Polonia, sa Republica Ceca, sa Slovacchia, sa Slovenia e s'Ungheria.

01/01/2008 Cipru e Malta adottant s'euro, aicci sa zona euro bessit a cuindixi membrus.

01/01/2009 Sa Slovacchia adottat s'euro, sa zona euro est a sexi membrus.

01/12/2009 Pigat balori su Trattau de Lisbona.

01/01/2011 S'Estonia adottat s'euro, sa zona euro est a dexassetti membrus.

31/03/2011 Mayotte passat de collettividadi de oltremari a dipartimentu de oltremari francesu, benendu a essiri degaicci offissialmenti territoriu de s'Unioni Europea.

01/04/2012 Su deretu de incumenciu de is cittadinus europeus permittit a unu millioni de cittadinus europeus de pigai parti in manera dereta a s'elaboratzioni de is politicas de s'UE, imbitandu sa Commissioni europea a presentai una proposta de lei.

01/07/2013 Sa Croatzia aderit a s'Unioni.

23/06/2016 Su Regnu Uniu sceberat de si nci bessiri de s'Unioni Europea cun unu referendum.

31/01/2020 Su Regnu Uniu si nde bessit de s'Unioni Europea de manera uficiali.

Staus membrus

modìfica

A su 2012 s'Unioni europea contat 27 Staus membrus: Austria, Belgiu, Bulgaria, Republica Ceca, Cipru, Croàtzia, Danimarca, Estonia, Finlandia, Francia, Germània, Grecia, Repùbrica de s'Irlanda, Italia, Lettonia, Lituania, Lussemburgu, Malta, Paisus Bascius, Polonia, Portugallu, Romania, Slovacchia, Slovenia, Spagna, Svezia e Ungheria. S'Unioni est crescia de is primus ses Paisus fundadoris de sa ci tandu narànta Comunidadi economica europea (singialaus in grussu) e s'est espandia ponendu a intru a pagu a pagu sa parti manna de is Staus soberanus europeus fincias a erribbai a sa situatzioni de oi. Su 1u de argiolas de su 2013 imbuccat peri sa Croatzia, is membrus funt 28. A cumintzai de su mesi de friaxu de su 2020, a fatu de sa Brexit e s'essida de su Regnu Uniu, is membrus funt torraus a basciai a 27.

In duas bortas e bia ddue funt stetias bariatzionis mannas de terriotoriu de s'Unioni europea peri chi custu no at currespondiu a s'imbuccada de unu Stau nou in s'Unioni:

Eletzionis europeas

modìfica

Po eligiri is rappresentantis italianus in su Parlamentu europeu s'Italia est dividìa in is circoscritzionis chi sighint, in basi a sa lei de su 24 gennargiu de su 1979, n. 18 (tra is parentisis is regionis ca ddi faint parti):

  1. Italia nord-occidentali (Piemonte, Valle d'Aosta, Liguria, Lombardia);
  2. Italia nord-orientali (Veneto, Trentino-Alto Adige, Friuli-Venezia Giulia, Emilia-Romagna);
  3. Italia centrali (Toscana, Umbria, Marche, Lazio);
  4. Italia meridionali (Abruzzo, Molise, Campania, Puglia, Basilicata, Calabria);
  5. Italia insulari (Sicilia, Sardigna).
 
Circoscrizionis elettoralis po su Parlamentu Europeu

.

Is circoscritzionis elettoralis postas paris faint su collegiu unicu natzionali.

Sa partidura de is seggius si fait dividendu su numeru de is bividoris de sa Repubblica po su numeru de is rappresentantis ca spettat a s'Italia in su Parlamentu europeu (immoa 72) e sparzendu is seggius in basi a sa popolatzioni de ogna circoscritzioni, a cantu risultat de s'urtimu censimentu generali, in basi a is quozientis intreus e de is prus artus coxus.

In basi a su censimentu generali (su de su 21 de ladamini de su 2001), ponit paris 6.600.871 bividoris. In su 2009, est oguali a n. 8 seggius distinaus.

Po evitai s'eletzioni de deputaus Sicilianus e bia in sa circoscritzioni Isulas, comenti giai in su 2004, Roberto Maroni, ministru de is Affaris de Intru, iat fattu isciri ca iat essi borfiu criai una circonscritzioni specifica "Sardegna" e bia po lampadas de su 2009[6]. Ma sa proposta parit ca bengiat de una proposta de lei de tempus primu[7] ma po is eletzionis de su 2009 no s'est arrenesciu a dd'otènni.

Riferimentus

modìfica
  1. ↑ url=http://www.ilsole24ore.com/art/SoleOnLine4/Mondo/2009/10/irlanda-ue.shtml?uuid=0310d6a8-aff1-11de-8481-cd283fb0b2c0&DocRulesView=Libero In Irlanda vince il sì all'Europa con oltre il 67% dei voti
  2. ↑ Consiglio dell'Unione europea, Treaty of Lisbon[ligàmene interrùmpidu]
  3. ↑ url=http://www.corriere.it/esteri/09_novembre_03/firmato-trattato-lisbona_43fbd19c-c88b-11de-b35b-00144f02aabc.shtml Klaus firma il Trattato di Lisbona - Barroso: «In vigore entro gennaio»
  4. ↑ url=http://www.apcom.net/newsesteri/20091201_075000_14cfb95_77482.html[ligàmene interrùmpidu] Ue entra in una nuova era, da oggi in vigore Trattato di Lisbona
  5. ↑ 5.0 5.1 5.2 5.3 Ripartizione delle competenze in seno all’Unione europea - europa.eu
  6. ↑ Kataweb.it
  7. ↑ Guidomelis.wordpress.com
Controllu de autoridadeVIAF (EN) 207634635 · ISNI (EN) 0000 0001 2375 4495 · BIBSYS (EN) 94000025 · BNE (ES) XX141032 (data) · BNF (FR) cb12350708p (data) · CANTIC (CA) a10068259 · CiNii (JA, EN) DA11072069 · GND (DE) 5098525-5 · HDS (DE, FR, IT) 013813 · LCCN (EN) n2004153355 · LNB (LV, EN) 000071269 · NDL (EN, JA) 00407066 · NKC (EN, CS) kn20010711086 · NLA (EN) 35383556 · NLK (KO) KAB201906323 · NSK (HR) 000194363 · OL OL3252327A · RERO 02-A000165977 · SELIBR (SE) 114565 · SUDOC (FR) 032486324 · Trove (EN) 933245 · WorldCat Identities (EN) n2004-153355

 
Wikimedaglia
Custu est unu de sos artìculos de su mese, est a nàrrere unu de sos mègius artìculos creados e postos in sa pàgina printzipale dae sa comunidade, chi l'at isseberadu pro su mese de santugaine/ledàmene de su 2014

Candidados pro sos meses benidores

Totu sos artìculos de su mese

Bogadu dae "https://sc.wikipedia.org/w/index.php?title=Unione_Europea&oldid=183323"